Архив новостей
26.09.2022
Тыдзень роднай мовы
З 19 па 24 верасня ў нашай школе, як і ў іншых установах адукацыі Беларусі, прайшоў Тыдзень роднай мовы.
Дэвізам тыдня сталі словы Уладзіміра Караткевіча: “Божа ўсемагутны! Не карай нас бяспамяцтвам і не дай нам забыцца святой мовы нашай беларускай, …а дай сілы і шчырасці з адданай любасцю і пашанаю прымнажаць спрадвечнае, высакароднае, што стварылі для нас нашы продкі”.
Тыдзень быў багаты на разнастайныя па форме правядзення мерапрыемствы і стаў яркай і запамінальнай падзеяй для школьнікаў. Кожны жадаючы меў магчымасць стаць удзельнікам флаер-фэста “Прыгажосць роднай мовы”, стварыць паштоўку-пажаданне роднай мове, прыняць удзел у стварэнні інтэрактыўнага воблака “Маё любімае слова па-беларуску”, у конкурсе крыжаванак “Смак роднай мовы”.
Новыя факты з жыцця Янкі Купалы адкрылі для сябе дзесяцікласнікі падчас віртуальнай экскурсіі “Дзяржаўны літаратурны музей Янкі Купалы запрашае…”. У час інтэрактыўнай гульні “Жыццё Янкі Купалы і Якуба Коласа” гэтыя факты дапамаглі атрымаць перамогу адной з каманд.
Кемлівасць, веды і добры настрой патрэбна было ўзяць з сабою вучням 3 класа, накіроўваючыся ў падарожжа “Мова родная, мова цудоўная!”
Колькі досціпу, жартаў, самабытнасці беларусаў было на гульні-віктарыне “Скарбы народнай мудрасці”, якая прайшла ў 5 класе!
Не пакінулі абыякавымі, падарылі добры настрой і музычныя перапынкі “Спяваюць Купала і Колас”, арганізаваныя вучнямі 7 класа.
Завяршыўся тыдзень падарожжам ў свет музыкі “Спяваем пра Беларусь” і майстар-класам “Цвяток Радзімы васілёк”.
На працягу ўсяго тыдня панаваў агульны цёплы, душэўны настрой.
Фотоальбом Шуй В.В., настаўнік беларускай мовы і літаратуры